Mikið hefur borið á því undanfarið að naglafræðingar prófi sig áfram með hinar ýmsu misheillandi útgáfur af gervinöglum. Ef þú hélst að þú værir búin að sjá allt, bíddu þá bara.
Rússneska naglastofan Nail Sunny hefur nú, að mati margra, gengið allt of langt. Í nýjasta myndbandi þeirra sem Metro greindi frá, má sjá þegar naglafræðingur útbýr gervineglur með lifandi maurum innan í.
Í myndbandi naglastofunnar má sjá hvernig naglafræðingurinn útbýr glærar neglur sem eru holar í miðjunni. Síðan tekur hún lifandi maura og stingur þeim innan í neglurnar þar sem þeir hlaupa um og reyna að komast út.
Naglastofan hefur fengið á sig mikla gagnrýni í kjölfar myndbandsins þar sem fólk hefur meðal annars sagt þeim að, „þrátt fyrir að það sé hægt, þá þýði það ekki endilega að maður eigi að gera það.“
Naglastofan hefur svarað neikvæðu gagnrýninni á þann hátt að fólk geti verið rólegt, þar sem skilið sé eftir gat sem gerir maurunum kleift að anda.
Sitt sýnist hverjum en það er þó nokkuð ljóst að flestir eru ekki sáttir með þessa tilraun naglastofunnar og tökum við á Bleikt undir með þeim.