Það er alltaf tími fyrir súkkulaði að mínu mati, á góðum og slæmum tímum og ef þú ert ekki sammála mér þá getum við því miður ekki verið vinir (nema þú gefir mér alltaf þinn skammt af súkkulaði). Hérna langar mér að deila með ykkur uppskrift af himneskri vegan súkkulaðimús. Ef orðið vegan hræðir þig þá get ég fullvissað þig um að hún gefur venjulegri súkkulaðimús ekkert eftir!
2 lárperur
1/2 bolli kókosrjómi
1/3 bolli kókosmjólk
1/2 bolli + 2 msk sykur
1/4 tsk salt
1/2 bolli + 2 msk kakó
1 tsk vanilludropar
Öll hráefni eru sett í blandara eða matvinnsluvél og blandað þar til blandan er orðin silkimjúk. Þá er músin tilbúin en það er mjög gott ef hún fær að standa í ísskáp í klukkutíma eða svo. Gæti varla verið einfaldara.
Mér finnst æðislegt að pimpa hana upp stundum, ef ég er í stuði fyrir það og set hérna fyrir neðan nokkrar mismunandi hugmyndir af útfærslu.
Fyrir ferskari útgáfu er gott að setja 1/4 piparmyntudropa með í blandarann/matvinnsluvélina og skreyta svo með ferskri myntu.
Fyrir sælkera útgáfu er geggjað að hella yfir karamellusósu af eigin vali og strá sjávarsalti yfir.
Fyrir klassísku útgáfuna mæli ég með að bera hana fram mér þeyttum rjóma og ferskum berjum, klárlega mitt uppáhalds.
Færslan er skrifuð af Laufeyju Ingu og birtist upphaflega á Vynir.is
Hægt er að fylgjast með Laufeyju á Instagram: lobbzter