Ari Eldjárn birtir skemmtilega færslu á Facebook þar sem hann óskar föður sínum, Þórarni Eldjárn til hamingju með 69 ára afmæli. Ara Eldjárn þarf vart að kynna en hann er okkar fremsti uppistandari og faðir hans Þórarinn eitt þekktasta og besta skáld þjóðarinnar. Hefur Ari síðustu vikur og mánuði einnig slegið í gegn á erlendri grundu. Telja þeir sem þekkja til í þessum bransa að hann eigi eftir að verða heimsfrægur hafi hann áhuga á því.
En aftur að kveðjunni. Ari sendir föður sínum, skáldinu Þórarni Eldjárn afmæliskveðju á Facebook og birtir þar skemmtilegt myndband. Viðtalið er tekið árið 1982 þar sem fjallað var um Halldór Laxness. Rithöfundurinn Steinunn Sigurðardóttir rabbar þar við Þórarinn. Ari situr í fangi föður síns með pelann og er heldur ósáttur við að þurfa að taka þátt í viðtalinu og á endanum brestur hann í grát. Ari segir um myndskeiðið:
Hér má sjá brot úr fyrsta viðtalinu sem við fórum í saman en það var árið 1982 í sjónvarpsþætti um Halldór Laxness og gerði ég að sjálfsögðu mitt besta til að stela athyglinni. Það eru ekki allir sem púlla það að ræða bókmenntir í Sjónvarpinu og sinna á sama tíma trítilóðum syni sínum (sem hefur lítið róast með árunum) en stóíska góðmennið róar mig þarna af sinni alkunnu yfirvegun líkt og hann gerir enn þann dag í dag. Til hamingju með afmælið elsku pabbi!