Dell Farrell hafði reynt allt til að léttast. Eða það hélt hún. Hún prófaði svokallaðar megrunarpillur og megrunardrykki auk þess að drekka sítrónuvatn og innbyrða cayenne-pipar í óhóflegu magni, allt án nokkurs sýnilegs árangurs. Hún bókstaflega þoldi ekki sjálfa sig fyrir að geta ekki lést og var komin að þolmörkum andlega og líkamlega. Þessi umfjöllun birtist áður á DV en er nú endurbirt á á Bleikt.
Dell Farrell, sem er frá Queensland í Ástralíu, var 69 kíló og var fituprósenta hennar 33 prósent þegar hún ákvað að nú væri nóg komið. Hún hætti í megrun og þá tók útlit hennar stakkaskiptum.
Fyrir Farrell hafði reynt ýmislegt til að léttast.
Farrell segir í viðtali við Daily Mail að hún hafi stundað hestamennsku af kappi á sínum yngri árum. Þegar hún flutti að heiman til að stunda háskólanám hafi hún hætt því og hreyft sig minna. „Ég var í kvöldskóla og borðaði bara það sem mér hentaði og drakk kók eða kaffi. Ég vakti oft fram eftir og mataræðið var lélegt,“ segir hún.
Farrell þyngdist og þó hún hafi reynt ýmislegt til að léttast virtist ekkert bera árangur. „Á sama tíma og ég innbyrti 1.200 hitaeiningar á dag lagði ég stund á Muay Thai og CrossFit, en samt léttist ég ekki. Ég gat ekki sofið, var stressuð og þoldi ekki sjálfa mig fyrir að geta ekki lést,“ segir hún og bætir við að hún hafi ákveðið að kynnast líkama sínum betur, eins og hún orðar það. Hún hafi farið á einkaþjálfaranámskeið en þar hafi verið hamrað á því fornkveðna; að kolvetni sé fitandi, sneyða eigi hjá öllum sykri og prótein ætti að innbyrða á tveggja til fjögurra tíma fresti allan daginn.
Farrell fór að lesa sér meira til um mataræði og ákvað að prófa það sem í fljótu bragði virðist vera svo sjálfsagt; fjölbreytta fæðu, líka sykur, kolvetni og fitu. „Þegar fólk klippir alveg á sykur hefur það tilhneigingu til að innbyrða fituríkari mat með fleiri hitaeiningum. Þegar ég breytti mataræði mínu gat ég borðað allt svo lengi sem ég passaði að borða alltaf ákveðið mikið af prótínum, kolvetni og fitu á hverjum degi,“ segir hún og bætir við að þannig hafi hún getað fengið sér ís eða annað góðgæti án þess að hafa áhyggjur af afleiðingunum.
Farrell segir að ferlið hafi verið hægt og það hafi tekið hana langan tíma að komast í það form sem hún vildi vera í. Hún hélt áfram að leggja stund á CrossFit og Muay Thai og komst með tímanum í frábært form. „Ég fór að lyfta þungum lóðum fjóra daga í viku. Þá daga sem ég lyfti ekki fór ég út að ganga eða í fjallgöngu,“ segir hún.
Nú, tveimur árum síðar, er Farrell fimmtán kílóum léttari og er fituprósenta hennar komin niður fyrir tuttugu prósent. „Ég hlakka til að mæta á æfingar á hverjum degi því það er það sem gefur mér orku,“ segir hún.
Svona er best að koma þér í formNokkur góð ráð frá Dell Farrell
Farrell segir að áður fyrr hafi hún verið feimin við að lyfta þungum lóðum þar sem hún var hrædd um að verða of mössuð. Það reyndist ekki á rökum reist enda er Farrell í toppformi.
Það kann ekki góðri lukku að stýra að ætla sér að sigra heiminn á einum degi. Farrell segir að hún hafi gefið sér góðan tíma til að koma sér í betra form. Hún segist hafa tileinkað sér eina nýjung á hverjum degi.
Kolvetni gefa þér orku sem þú getur notað til góðra hluta í ræktinni.
Dæmigerður matseðill
Þetta borðar Dell Farrell
Morgunmatur: Kornmeti eða hafrar (hafragrautur) með fitulítilli mjólk. Kalt kaffi.
Morgunsnarl: Ávextir
Hádegismatur: Búrrító
Kvöldmatur: Kjúklingur eða fiskur með sætum kartöflum eða venjulegum kartöflum
Eftirréttur/kvöldsnarl: Frosin jógúrt
