Þann fimmtánda febrúar á þessu ári fæddust tvíburar sem læknar hafa sagt vera „einn á móti milljón“. Ástæðan fyrir þeirri útskýringu er vegna þess að önnur þeirra fæddist með litningargalla en hin heilbrigð.
„Það eina sem ég man var að læknirinn baðst afsökunar,“ sagði Nicola Bailey móðir tvíburanna í samtali við Metro. Læknarnir vissu ekki að Harper væri með litningagalla fyrr en hún kom í heiminn um 38 mínútum á undan systur sinni Quinn.
Foreldrunum Todd og Nicola Bailey fannst afsökunarbeiðni læknanna óþörf enda elska þau báðar stelpurnar jafn mikið.
„Þær voru báðar svo fallegar. Harper hafði ekki sýnt neitt óeðlilegt í sónurum og læknarnir höfðu ekki áttað sig á því að hún væri með litningargalla.“
Þrátt fyrir að foreldrarnir hafi orðið hissa við fæðinguna segja þau bæði að þau myndu ekki vilja breyta neinu.
Nicola segir að sambandið á milli stúlknanna tveggja sé einstakt en viðurkennir þó að Quinn hafi verið afbrýðisöm út í Harper.
„Quinn er afbrýðisöm útaf hári Harper. Quinn er með ljóst úfið hár á meðan Harper er með mikið brúnt hár sem hægt er að setja í teygju.“
Harper þarf líklega að fara í aðgerð til þess að laga gat í hjarta hennar þegar hún verður sex ára en það er algeng fyrir börn sem fæðast með Downs heilkenni.
Nicola er staðráðin í því að fræða fólk um Downs heilkennið og draga úr fordómum.
„Harper er Harper og Quinn er Quinn. Þær eru ekki sama manneskjan svo ég reyni að bera þær ekki saman, þrátt fyrir að það geti verið erfitt. Við sjáum fólk oft stara á hana og það getur verið neikvætt. Fólk hefur sagt við okkur „ Ó er hún Downs barn og ég þekki Downs stelpu“. En hún er ekki Downs barn, hún er barn sem fæddist með Downs heilkenni.“