Íslensk kona rakst um daginn á barnabók sem fjallar um þrjár vinkonur. Tvær vinkonurnar eru fallegar en sú þriðja er ljót. Þegar strákur í bókinni verður hrifinn af ljótu vinkonunni verða fallegu vinkonurnar afbrýðisamar.
Bókin heitir „Skvísurnar“ og segist konan sem fann bókina vera í sjokki yfir innihaldi hennar.
„Bókin er hræðileg. Í henni er sagt að strákur sé ljótur og að ein stelpan myndi hoppa fram af kletti ef hún væri hann. Bróðir „ljótu“ vinkonunnar og vinir hans horfa á stelpurnar fáklæddar í gegnum glugga án þess að þær viti af því. Bókin lætur stelpur líta út fyrir að hugsa bara um stráka, að þær séu öfundsjúkar og að þær séu ljótar nema þær hafi stór brjóst og rass. Ég myndi aldrei leyfa barni að lesa þetta,“ segir hún þar sem hún deilir myndum af bókinni á samfélagsmiðlum.
Bleikt fékk góðfúslegt leyfi til þess að birta myndir konunnar af bókinni en vildi hún þó ekki koma fram undir nafni.
Í bókinni má sjá þar sem ein af fallegu stelpunum fer að æla vegna þess að önnur vinkona þeirra hafði fitnað. Einnig má þar sjá hvar kennarar í skólanum setja bann á það hvers konar fötum stúlkurnar megi ganga í.