Inga Sæland, formaður Flokks fólksins ætlar að giftast æskuástinni, Óla Má Guðmundssyni. Parið er búsett í glæsilegri 148 fermetra eign við Maríubaug í Grafarholti sem þau leigja af Brynju, Hússjóði Öryrkjabandalagsins. Var leigan um 110 þúsund krónur en kveðst Inga Sæland hafa boðist til að greiða hærri leigu eftir að hún settist á þing. Inga vakti mikla athygli í kosningunum og þótti árangur flokksins fara langt fram úr vonum.
Á Vísi er greint frá því að Inga og Óli stefni á að gifta sig. Dagsetning liggur ekki fyrir. Parið gifti sig fyrst þegar Inga Sæland var 18 ára og Óli 24 ára. Eiga þau saman fjögur börn. Þau skildu árið 2000 en tóku svo aftur saman. Í kosningabaráttunni sagði Inga:
Ég er landsbyggðarstúlka, fædd og uppalin á Ólafsfirði. Flutti til Reykjavíkur árið 1994 og hef búið þar síðan. Ég er baráttukona og réttlæstissinni, og vil leggja mitt af mörkum til að útrýma mismunun, fátækt og spillingu. […] Ég er fráskilin fjögurra barna móðir og amma.“
En Inga og Óli ákváðu eins og áður segir að hefja aftur samband og stefna nú á að giftast.
„He‘s the love of my life,“ sagði Inga við Vísi.
