Ertu orðinn þreyttur á að bylta þér í rúminu í erfiðri baráttu við að sofna? Bandarískur læknir segist hafa fundið hina einu og sönnu lausn á þessum vanda. Lausn sem geri það að verkum að fólk sofni á aðeins einni mínútu.
Það eru til mörg ráð um hvernig er best að sofna fljótt og vel en bandaríski læknirinn Andrew Weil telur sig hafa eina allra bestu aðferðina við að sofna fljótt og vel. Hann kallar hana 4-7-8-aðferðina en hún gengur út á einfaldar öndunaræfingar sem eiga að fá fólk til að sofna á aðeins einni mínútu.
Aðferðin er svona:
1. Tæmdu allt loft úr lungunum út um munninn.
2. Dragðu andann að þér hægt og rólega í gegnum nefið á meðan þú telur rólega upp að fjórum.
3. Haltu niðri andanum á meðan þú telur upp að sjö.
4. Andaðu rólega frá þér í gegnum munninn á meðan þú telur upp að átta. Þegar þú kemur upp í átta á allt loft að vera komið úr lungunum.
5. Endurtaktu þetta að hámarki fjórum sinnum.
Það er ekki öruggt að þetta virki í fyrsta sinn sem fólk prufar þetta en það getur borgað sig að æfa sig í þessu að sögn Weil.