Í mörgum systkinahópum er oft hörð barátta á milli systkinanna um hina ýmsu hluti og hver stendur sig best. Niðurstöður nýrrar rannsóknar eru líklegast til þess fallnar að kynda undir þessa keppni á milli systkina því samkvæmt niðurstöðunum þá er greindarvísitala elstu systkinanna hærri en þeirra yngri.

Elstu systkinin geta því fagnað þessum niðurstöðum vel og innilega og mörg munu væntanlega benda á að þetta hafi þau alltaf vitað, þau skari framúr í systkinahópnum. En það er þó eitt mikilvægt “en“ tengt niðurstöðunum og það ætti að geta glatt þau yngri. Niðurstöðurnar sýna nefnilega að greindarvísitala elstu systkinanna er aðeins einu stigi hærri en hjá þeim yngri.

Það voru vísindamenn við Illinois háskólann í Bandaríkjunum sem framkvæmdu rannsóknina og tóku 377.000 menntaskólanemar þátt í henni. Rannsakað var hvernig aldursröð þeirra innan fjölskyldna þeirra hafði áhrif á þá.

Niðurstöðurnar sýndu að greindarvísitala elstu systkinanna er einu stigi hærri en hjá þeim yngri og þau eldri hafa tilhneigingu til að vera opnari, geðfelldari og samviskusamari en þau yngri.