Bandaríski leikarinn George Clooney var fluttur á sjúkrahús eftir mótorhjólaslys á Sardiníu á Ítalíu í morgun. Lenti Clooney í árekstri við Mercedes Benz-bifreið og er Clooney sagður hafa endað á framrúðu bifreiðarinnar sem brotnaði.
Í frétt Mail Online, sem birtir meðfylgjandi mynd, lá Clooney í götunni og kenndi sér meins í mjöðm auk þess að kvarta undan sársauka í handleggjum og fótum. Sem betur fer slasaðist leikarinn ekki alvarlega og var hann útskrifaður ekki löngu síðar.
Forsvarsmenn John Paul II sjúkrahússins í Olbia staðfestu að Clooney hefði verið fluttur á sjúkrahúsið þar sem meðal annars var tekin röntgenmynd. Hann er sagður hafa yfirgefið sjúkrahúsið skömmu síðar í fylgd eiginkonu sinnar, Amal.
Amal og George, ásamt tvíburum þeirra, Ellu og Alexander sem eru eins árs, búa á Sardiníu í sumar. Á þessari fallegu ítölsku eyju standa yfir tökur á nýrri sjónvarpsþáttaröð úr smiðju leikarans, en þættirnir bera heitið Catch 22.