Þegar Valkyrja Sandra var nýbúin að komast að því að hún gengi með barn fékk hún þær erfiðu fréttir að maður sem hún treysti fyrir fáklæddum myndum af sér væri að dreifa þeim á netinu.
„Það er ekki samfélagslega samþykkt að taka af sér myndum léttklæddum, jafnvel nöktum. Hvað þá að senda þær á einhvern. En verum raunsæ, það gera þetta mjög margir,“ segir Valkyrja í einlægri færslu á bloggsíðu sinni.
„Ég skrifaði fyrir stuttu pistil um sjúka ást og fann fyrir þvílíkum létti að kasta þessu út í kosmósið. Núna langar mig að gera svipaðan hlut, nema nú um töluvert alvarlegri hlut. Hlut sem enginn hefur rétt á að gera þér. Ræna þig sjálfum öllu valdi.“
Valkyrja segir ekki í lagi að fólk sé dæmt í samfélaginu fyrir það að taka af sér og senda nektarmyndir.
„Þegar manneskja tekur meðvitaða ákvörðun um að taka svona mynd af sér og senda hana, þá er það að treysta manneskjunni fyrir þessu. Viðkomandi sem fær myndina hefur engan rétt á að sýna neinum hana, aldrei. Það er ólöglegt, en lögin ná bara ekki lengra en það að svona málum er kastað upp í hillu og þau fyrnast.“
Í febrúar árið 2017 var Valkyrja nýbúin að komast að því að hún var ólétt af yngri syni sínum.
„Ég var að drepast úr morgunógleði og reyndi að sofa af mér alla morgna. Um hádegi er dinglað og inn gengur vinkona mín öskrandi: Hann er að dreifa myndum af þér Sandra!“
Valkyrja segir hugann strax hafa farið á fullt um það hvernig hún gæti afsakað sig.
„Ég ældi næstum hjartanu. Ég á börn, hvað á ég að segja við mömmu og pabba, en bræður mína og systur. Hann er búinn að eyðileggja mig. Ég er ekkert. Aumingja maðurinn minn, hvað nú?“
Þennan sama dag gekk Valkyrja inn á lögreglustöðina á Akureyri og kærði þann sem dreifði myndunum af henni.
„Hann dreifði af mér myndum og hótaði að gera það aftur. Þetta er allt saman svart á hvítu og brotaviljinn er einbeittur. Mér var skipaður réttargæslumaður, frábær kona sem vill fara með þetta mal alla leið. En það er stopp. Þetta er ekki forgangsmál.“
Valkyrja spyr sig hvernig það megi vera að jafn alvarlegt mál og þetta skuli ekki fá forgang.
„Hvernig er það ekki forgangsatriði að stöðva manneskju sem er með allskonar myndir af þér og hikar ekki við að sýna þær og senda? Ef ég hefði ekki haft manninn minn, vinkonur mínar og vini til þess að stappa í mig stálinu, kennt mér að elska mig og vera stolt þá væri ég ekki hér. Þá hefði þessi maður rænt lífi mínu. Hann væri með mig í heljargreipum og væri hlæjandi að því. En ég er sterk. Það er ekki að spyrja að leikslokum ef ekki væri fyrir það. Ég bogna kannski, en brotna aldrei.“
Valkyrja vill að þeir sem lendi í sömu aðstæðum og hún taki valdið sitt til baka.
„Ef það er einhver sem er að standa í þessu, líður illa og finnst einhver vera að halda sér í tilfinningalegu fangelsi taktu þá valdið þitt til baka, þú getur það, ég lofa.“