Móðir sem hefur reglulega rennt sér niður rennibrautir með börnunum sínum, ómeðvituð um þá hættu sem skapast getur hefur birt mynd af augnablikinu sem eins árs gömul dóttir hennar fótbrotnaði á leið þeirra mæðgna niður rennibraut.
Rétt áður en þær mæðgur renndu sér hafði Heather Clare, móðir stúlkunnar rennt sér niður með syni sínum.
„Ég renndi mér fyrst með Matthew en hann var heppinn. Þegar ég renndi mér niður með Meadow þá festist fóturinn á henni á milli mín og rennibrautarinnar. Þessi mynd er af augnablikinu sem fóturinn hennar var að brotna. Hún er ennþá brosandi af því að fóturinn brotnaði nákvæmlega á þessu augnabliki,“ segir Heather í samtali við Metro.
Þegar Heather fór með dóttur sína á bráðamóttökuna sagði læknirinn sem tók á móti þeim mæðgum að þetta slys væri allt of algengt.
„Ég haði enga hugmynd um það. Ég hélt að allir renndu sér niður með börnunum sínum. Mér finnst að það ætti að vera skilti á öllum leikvöllum sem vara við þessari slysahættu.“
Heather ákvað að deila myndinni í þeirri von um að vara aðra foreldra við.
„Ég vona að að sársaukinn sem Meadow gekk í gegnum og samviskubitið sem ég hef þurft að þola eftir þetta atvik muni bjarga öðrum börnum.“