Á sjómannadaginn síðasta var Hrund Óskarsdóttir stödd erlendis á meðan maðurinn hennar tók þátt í gólfmóti þar sem hann vann gjafabréf fyrir þau hjónin út að borða á Slippnum í Vestmannaeyjum.

„Hann var náttúrulega alsæll með vinninginn, kemur heim og leggur umslagið á borðið og heldur svo bara áfram að djamma,“ segir Hrund í samtali við Bleikt.

Þegar Árni, eiginmaður Hrundar fór svo að leita að gjafabréfinu daginn eftir beið hans óvænt uppákoma.

„Daginn eftir fer hann að tékka á gjafabréfinu en þá hafði Aska, hundurinn okkar tekið gjafabréfið úr umslaginu og borðað það! Hún skildi umslagið eftir og át gjafabréfið. Hann leitaði og leitaði að því og fann svo bara þessi horn sem eftir voru af því. Hún Aska var alveg alsæl. Ég held að gjafabréfið hafi verið fyrir 15 þúsund krónur og hún bara át það! Hún hefur bara verið að mótmæla.“

Hjónin hafa hlegið mikið af atvikinu en Aska sem er af tegundinni Weimaraner er eins og augljóst er, algjör grallari og gleðigjafi.