Eftirvæntingin og spennan sem verðandi foreldrar upplifa þegar þeir komast að því að lítill erfingi er á leiðinni er erfitt að útskýra. Við taka níu mánuðir í bið og undirbúning en undir lok meðgöngunnar eru konur oft orðnar mjög óþreyjufullar enda mikið álag á líkamann að ganga með barn.
Svefnlausar nætur fara að gera vart við sig og oft á konan í stökustu vandræðum með að slaka á síðustu dagana fyrir fæðingu.
Það er þó ekkert sem getur undirbúið nýbakaða foreldra fyrir það mikla svefnleysi sem fylgir því að eignast lítið barn. Samkvæmt nýrri rannsókn sem Metro greinir frá fá nýir foreldrar ekki nema 4 klukkutíma og 44 mínútur í svefn á hverri nóttu að meðaltali fyrsta árið eftir að barnið fæðist.
Þeir eyða jafnframt að meðaltali um klukkutíma á hverjum degi í það að reyna að fá barnið til þess að sofa. Mikið af þeim tíma fer í að rugga barninu fram og til baka.
Svefnleysið getur haft mikil áhrif á minni foreldra, samband þeirra og almenna virkni þeirra í lífinu. Ungabörn eru að vakna að meðaltali þrisvar sinnum á nóttu og í rannsókninni viðurkenndu tveir þriðju þátttakenda það að hafa rifist við maka sinn einungis vegna þreytu.
Um 11% þátttakenda viðurkenndu að þeir hafi séð ofsjónir og 44% viðurkenndu að þeir hafi gleymt hvað þeir voru að tala um í miðri setningu. 8% þátttakenda viðurkenndu að hafa gleymt nafninu á barninu sínu.
Nú þegar við höfum þessar upplýsingar, hvað er hægt að gera til þess að öðlast betri svefn?
