Rappararnir Nicki Minaj og Eminem eru nýtt par ef marka má innlegg á Instagram-aðgangi Minaj. Var hún að kynna nýtt lag sitt, Big bank, en í því minnist hún á Eminem. Spyr þá einn fylgjenda hennar hvort hún og Eminem séu að hittast sem Nicki svarar játandi. Þó er ekki fullvíst hvort hún sé að svara þessu í alvöru eða hafi jafnvel hugsað þetta sem grín til auka umfjöllun og áhuga á laginu.
Nicki Minaj og Eminem, sem eru hvort tveggja einar stærstu kanónur rappheimsins, gáfu saman út lagið Roman’s Revenge árið 2010. Síðast var Minaj í sambandi með rapparanum Nas og þar á undan Meek Mill sem hefur staðið í stappi við bandaríska réttarkerfið undanfarið vegna óvenju hás dóms sem hann fékk fyrir brot á skilorði.