Hinn 16 ára gamli Dominic Ibaos taldi ekkert að ljósmyndum sem hann hlóð upp á Facebook-síðu sína af þriggja daga gömlum, hárlausum hvolpi, hrukkóttum um háls og steinsofandi í lúku eigandans.
Kerfisstjórar samfélagsmiðilsins voru ekki lengi að loka á myndina þegar hún var merkt sem klám af notanda í Facebook-hópi sem var ætlaður dýraeigendum. Dominic fékk þau skilaboð send að ljósmyndin af nýja gæludýrinu þótti ekki mæta siðferðilegum kröfum samfélagsmiðilsins.
Dominic er frá Filipseyjum og á tólf hunda. Í spjalli við miðilinn The Sun sagðist hann upphaflega ekki sjá typpið á þessari mynd, bara hvolpinn sinn Dimitri. „Fyrst var ég reiður en þegar ég sá hvað fólki fannst þetta fyndið leið mér aðeins betur,“ bætir hann við.
„Það er fyndið að þetta skuli vekja svona mikla athygli fyrir að líta út eins og typpi, en samt get ég haldið áfram að deila myndinni því þetta er ekki typpi“.