Búið er að kryfja lík sænska tónlistarmannsins Tim Bergling, sem var best þekktur undir listamannsnafninu Avicii, en Bergling lést í Muscat, höfuðborg Ómans, á föstudag.
Fregnir um dauða þessa vinsæla tónlistarmanns komu aðdáendum hans í opna skjöldu enda var hann aðeins 28 ára og í blóma lífsins.
Breska blaðið Guardian fjallar um málið í dag og þar segir að tvær krufningar hafi farið fram um helgina. Haft er eftir lögreglu að þær hafi leitt í ljós að dauða hans hafi ekki borið að með glæpsamlegum hætti. Þó hafa þær ekki leitt í ljós, að minnsta kosti svo vitað sé, hvað varð honum að bana.
Avicii hefur komið að mörgum af þekktustu rafdanstónlistarlögum síðustu ára og unnið með mörgum frægum listamönnum. Hann var staddur í fríi í Óman þegar hann lést og eru foreldrar hans og þrjú systkini komin til landsins þar sem þau munu fylgja líkinu aftur til Svíþjóðar.
Þúsundir komu saman í Stokkhólmi um helgina til að votta tónlistarmanninum virðingu sína. Meðal þekktustu laga hans má nefna lögin Wake Me Up og Levels.
Avicii hætti að koma fram opinberlega árið 2016. Það var með ráðum gert enda hafði álagið og mjög mikil áfengisneysla tekið sinn toll af honum. Avicii hætti þó ekki að semja tónlist en á síðasta ári kom hans síðasti smellur, Lonely Together, með bresku tónlistarkonunni Rita Ora.