Fjölmiðlakonan góðkunna Kolbrún Björnsdóttir mun líklega halda sig heima þann 9. apríl á næsta ári. Kolbrún slasaðist illa í hjólaslysi 9. apríl 2016 sem setti tilveruna á hvolf. Kolbrún var staðráðin í að njóta 9. apríl með vinkonum sínum en í stað þess að hjóla var ákveðið að skokka og fara í sjósund á eftir. Kolbrún sagði á Facebook: „Þið vitið, búa til jákvæðar og góðar minningar á þessum degi.“
Það fór ekki betur en svo að Kolbrún fékk botnlangakast og endaði á bráðamóttöku. Kolbrún horfir hins vegar á björtu hliðarnar eins og vanalega og segir á léttu nótunum að eiginmaður hennar hafi beðið hana að fljúga aldrei á þessum degi. Hafa vinkonur Kolbrúnar ákveðið að pakka henni inn í bómull þegar þennan mánaðardag ber upp á næsta ári. „Ég get útilokað að lenda í botnlangakasti þegar ég dvel í ríflega mánuð í Nepal í haust,“ segir Kolbrún og bætir við: „Ég er því þegar öllu er á botninn hvolft ein heppin pía.“
