Rappdrottningin Nicki Minaj er komin á fast á nýjan leik en kærasti hennar er fertugur og heitir Kenneth Petty. Minaj hefur verið í hópi vinsælustu tónlistarmanna síðustu ára og er hún sú stjarna sem er með einna flesta fylgjendur á Instagram, eða rúmlega 96 milljónir.
Eðli málsins samkvæmt fylgjast slúðurmiðlar vestanhafs með einkalífi hennar og hafa þeir nú grafið upp sitthvað um fortíð Petty.
TMZ greinir frá því að Petty hafi eitt sinn setið í fangelsi í tæp fjögur ár vegna tilraunar til nauðgunar. Er hann sagður hafa ógnað stúlkunni með hníf. Petty og stúlkan voru bæði sextán ára þegar atvikið átti sér stað árið 1994. Petty var sakfelldur árið 1995 og er á skrá yfir dæmda kynferðisbrotamenn í New York-ríki.
Í mars 2006 játaði Petty sig svo sekan af ákæru um manndráp. Skaut hann mann að nafni Lamont Robinson til bana. Hann var ákærður fyrir morð af annarri gráðu en komst að samkomulagi við saksóknara um vægari refsingu gegn því að játa brot sitt. Hann var dæmdur í tíu ára fangelsi og sat inni í sjö ár. Honum var sleppt úr fangelsi árið 2013 en afplánun refsingar var lokið í maí á þessu ári.
Nicki Minaj hefur birt mynd af þeim saman á Instagram og eyddu þau liðinni helgi saman í tilefni af 36 ára afmæli söngkonunnar. Að því er TMZ greinir frá eru Minaj og Petty gamlir vinir og kynntust þau í Queens-hverfinu í New York fyrir margt löngu.
