Síamstvíburar sem deildu lifur gengust undir aðgerð í dag þar sem þær voru skildar að. Tuttugu læknar og hjúkrunarfræðingar tóku þátt í aðgerðinni sem framkvæmd var í Ástralíu og tók sex klukkutíma.

Tvíbura stúlkurnar sem eru fimmtán mánaða gamlar heita Nima og Dawa. Þær eru frá Bhutan í suður Asíu.

Fyrir aðgerðina voru læknarnir ekki vissir um það hvort tvíburarnir deildu líka þörmum en það hefði flækt aðgerðina til muna.

„Sem betur fer komumst við að því að þarmar stúlknanna voru aðeins flæktir saman en ekki samtengdir. Það var ekkert sem gat verið að inni í stúlkunum sem við vorum ekki virkilega undirbúin fyrir,“ sagði Joe Crameri yfirskurðlæknir á Royal barnaspítalanum í Melbourne í viðtali við Metro.

„Við sáum tvær ungar stúlkur sem voru tilbúnar fyrir aðgerðina, þeim gekk vel í aðgerðinni sjálfri og eru nú að jafna sig.“

Stúlkurnar voru fastar saman fyrir neðan bringu að mjaðmagrindinni. Þær komu til Ástralíu með móður sinni Bhumchu Zangmo fyrir um mánuði síðan en læknar í Bhutan höfðu ekki getað skilið stúlkurnar að sökum vankunnáttu.

Talið er að næstu 24-48 klukkutímar skipti miklu máli fyrir stúlkurnar en læknarnir eru bjartsýnir á framhaldið.