Ung kona sem hefur þjáðst af alvarlegu tilfelli af exemi síðan hún var barn ákvað að breyta algjörlega um lífsstíl þegar engin lyf né læknar gátu hjálpað henni lengur.
Camille Knowles er tuttugu og sjö ára gömul og býr hún í Manchester. Camille greindist með exem þegar hún var sex ára gömul og hefur hún í gegnum tíðina prófað allskonar lyf og krem sem hafa lítið gert fyrir hana. Exem Camille var svo alvarlegt að hún var oft lögð inn á spítala með blæðandi sár um allan líkama.
Þegar Camille var tuttugu og tveggja ára gömul gafst hún upp á öllu því sem reynt hafði verið að gera fyrir hana og ákvað að taka málin í sínar hendur. Hún hætti alfarið að drekka áfengi, skipti yfir í lífræna fæðu sem stendur aðallega af grænmeti ásamt lífrænu kjöti og fisk. Einnig ákvað hún að eyða kvöldunum sínum í það að liggja í baði með söltum og olíum.
„Ég hef komist að því að ef ég forðast glúten, mjólkurvörur og unninn sykur þá er húðin á mér mun betri svo ég reyni eins og ég get að forðast þetta allt. Vanalega borða ég fæðu sem er aðallega unnin úr plöntum ásamt því að borða lífrænt kjöt og fisk,“ segir Camille í viðtali við TheSun.
Í dag fær Camille sér af og til rauðvín, gin og tónik og kampavín en ef henni langar að finna á sér þá fær hún sér oftast kombucha.
Camille breytti líka alveg um húðumhirðu og fer hún nú í bað á hverju kvöldi þar sem hún setur sjávarsalt og laxerolíu í baðvatnið ásamt því að búa sér til sinn eigin andlitsmaska.
„Ég reyni líka að nota algjörlega náttúrulegar snyrtivörur. Mér finnst líka virkilega mikilvægt að stunda reglulegar æfingar úti við. Hvort sem það er að fara í fjallgöngur eða að synda í söltum sjó.“
Camille ákvað að deila reynslu sinni af sjúkdómnum með eins mörgum og hún getur og skrifaði hún og gaf nýlega út bókina The Beauty of Eczema.