Jess Brown birti mynd af dóttur sinni, Lilly, sem er 10 ára gömul, liggjandi á sjúkrahúsi, eftir að hafa tekið of stóran skammt af lyfjum. Myndin var tekin á tíu ára afmælisdegi hennar.
Talið er að Lilly hafi orðið fyrir miklu einelti samnemenda sinna undanfarna mánuði vegna útlits síns. Að sögn móðurinnar höfðu jafnaldrar dóttur hennar kallað Lilly feita og beitt hana ofbeldi. Jess segir að skólinn hafi lítið gert til að taka á þessum málum, en breski fréttamiðillinn Worcester News greindi fyrst frá þessu.
Þetta leiddi til þess að Lilly var komin djúpt í sjálfsvígshugleiðingar og tók hún verkjalyf og aðrar pillur sem hún fann í baðherbergisskáp á heimili sínu. Jess kom að henni áður en það var um seinan og fór með Lilly til heimilislæknis. Að hans ráði var þeim vísað á sjúkrahús þar sem lyfin voru fjarlægð úr Lilly í gegnum magadælingu.
„Mér er óglatt yfir því að skólinn geri ekkert í þessu. Það vill enginn gera neitt,“ segir Jess við fréttamiðilinn og bætir við að foreldrar hrottanna sem réðust á dóttur hennar hafi hlegið að sér þegar hún hafði samband. „Hún fer ekki aftur í þennan skóla, það er ekki áhættunnar virði. Ég ætla ekki að grafa barnið mitt.“
Þegar Jess tók ljósmyndina var Lilly miður sín á afmælisdegi sínum eftir að hafa kastað upp eftir aðgerðina. Móðirin tók þá ákvörðun að deila myndinni í forvarnarskyni til að sýna hvaða alvarlegu áhrif einelti getur haft á líf og sjálfsmynd þolandans.
Nokkrum dögum áður hafði Jess birt myndband af Lilly í tárum þar sem hún opnaði sig um eineltið í skólanum. Myndbandið er tæplega níu mínútna langt og þar heyrist stúlkan segja að eineltið hafi versnað undanfarnar vikur. Lilly sigtar út einn tiltekinn hrotta sem hún segir hafa hárreytt og sparkað í sig.
Þá segir Lilly að samnemandi hennar ætli sér að halda áfram þangað til hún flyst úr skólanum. „Hún ætlar að halda þessu áfram þangað til ég verð reið. Ég vil ekki drepa mig.“
Lilly hóf göngu sína í Witton miðskólanum í Droitwich í Bretlandi í september og vill móðir hennar meina að hún hafi skynjað snemma að eitthvað væri ekki með felldu. Þegar fréttavefurinn hafði samband við Cath Crossley, skólastjóra miðskólans, sagði hann ekki annað koma til greina en að taka hart á þessum málum og gera ráðstafanir tafarlaust í ljósi þessara atburða. „Hugur okkar er svo sannarlega með Lilly-Jo og fjölskyldu hennar á þessum erfiðu tímum.“