„Flýtið ykkur, hún er að deyja!! Geriði það, flýtið ykkur!“ hrópaði Miranda Harrell í símtali við Neyðarlínuna þann 22.október síðastliðinn. Á meðan horfði hún upp á fjölskylduhundinn ráðast á eins árs gamla dóttur sína. Það var sama hvað Miranda reyndi, dýrið var gjörsamlega stjórnlaust.

Fjölskyldan er búsett í Rocky Mount í Norður Karólínu. Mæðgurnar höfðu verið að leika sér saman úti í garði þegar hundur fjölskyldunnar, 6 ára gamall pit bull, réðst skyndilega á dóttur Miröndu og reyndist ómögulegt að stoppa hann.

Á upptöku af símtalinu til Neyðarlínunnar  má heyra starfsmann reyna sitt besta við að ráðleggja örvæntingarfullri móður í þessum hrikalegu aðstæðum.

„Hann hættir ekki, hjálpið mér, hún er að deyja!“ heyrist Miranda æpa.

Miranda fylgir fyrirmælum starfsmannins, sem fyrst ráðleggur henni að setja prik í kjaft hundsins og þvínæst að berja hann í hausinn með pönnu.

Þegar hvorugt ráðið virkar ráðleggur starfsmaðurinn henni að hlaupa inn í eldhús og sækja hníf, og því næst skera hundinn á háls.

„Hnífurinn er of bitlaus,“ heyrist Miranda þvínæst stynja upp grátklökk. Starfsmaðurinn svarar henni: „Þú verður að reyna hvað sem er til að fá hundinn til að sleppa. Líf hundsins er ekki það sem skiptir máli á þessari stundu.“

Því næst slitnar símtalið.

Fram kemur á vef Telegram að móðirin, sem orðin var vitstola af skelfingu hafi jafnvel reynt að stinga hundinn, en allt kom fyrir ekki.

Fram kemur á vef Daily Mail að lögreglan hafi mætt á vettvang skömmi síðar og skotið hundinn til bana. Tvisvar þurfti að hleypa af byssunni áður en dýrið gaf loks upp öndina.

Triniti litla var flutt á sjúkrahús þar sem hún lést af völdum áverka sinna þann 29.október síðastliðinn.