Sharran Sutherland, ellefu barna móðir í Bandaríkjunum, hefur vakið talsverða athygli á samfélagsmiðlum eftir að hún deildi ljósmyndum af andvana syni sínum sem hún fæddi eftir 14 vikna meðgöngu. Á ljósmyndunum sjást litlar hendur og fætur barnsins, sem vó 26 grömm og var 10 sentímetrar á hæð. Fréttavefurinn The Sun greinir meðal annars frá þessu.

Sharran ákvað að deila ljósmyndunum til að sýna að þarna væri alvöru barn, sem hefði fæðst 173 dögum á undan áætlun. Samkvæmt lögum í útvöldum fylkjum Bandaríkjanna, þar á meðal í Missouri, flokkast börn ekki lagalega séð undir lífverur fyrr en á tuttugustu viku meðgöngu. Út af þessum reglum munaði litlu að læknarnir hefðu afskrifað fóstrið sem læknisúrgang hefðu foreldrar ófædda drengsins ekki skipt sér af.

Hermt er að læknar hafi hvatt Sharran til þess að gangast undir aðgerð til að fjarlægja fóstrið þegar kom í ljós í sónar að hjartslátturinn hefði stöðvast. Sharran þverneitaði og sagðist hafa heimtað náttúrulega fæðingu. „Ég vildi ekki að barnið mitt kæmi út í molum,“ segir Sharran.

Móðirin bætir við að hún hafi orðið bálreið yfir uppástungum lækna að losa sig við látna barnið eins og hvert annað rusl, auk þess að þeir hafi kallað Miran fóstur í stað barns.

„Ég trúði því ekki hversu fullkomlega mótaður drengurinn var. Eyrun, tungan, gómurinn, varirnar. Þetta var ótrúlegt,“ segir Sharran sem tekur fram að hún sé þakklát fyrir að hafa getað fengið að halda á syninum, sem hlaut nafnið Miran.

„Þetta snýst ekki um sorgina, þetta snýst um að viðurkenna og skilgreina fóstrið sem einstakling,“ segir hún.

Þau Sharran og Michael, maðurinn hennar, ákváðu að geyma son sinn í ísskápnum í viku áður en hann var jarðaður í blómapotti í garðinum. „Ég veit að það hljómar skuggalega en ég vildi ekki að líkið myndi rotna eða lykta. Ég vissi ekki hvað ég átti að gera. Ég var ekki reiðubúin til þess að kveðja hann strax,“ segir Sharran. „Það var ótrúlega erfitt að grafa hann. Mig langaði að grafa hann strax upp aftur.“