Vera Wonder Sölvadóttir greinir frá því á samskiptamiðlum að brotist hafi verið inn í ökutæki hennar í miðbænum. Er þetta í þriðja sinn sem Vera verður fyrir barðinu á þjófum. Í þetta sinn stálu þeir síma, innkaupapoka úr Nettó sem Logi vinur hennar átti og svo sundskýlu. Þá óttaðist Vera að hún hefði glatað dýrmætum hlutum úr æsku sinni.
„Í skottinu var lítil kista með gömlum bréfum, dagbókum, verðlaunagripum og fleiru sem er mér mjög kært. Logi hringdi í mig til að tilkynna mér þetta í gær. Frekar leiðinlegt mál.“
Ekki leið á löngu þar til Vera fékk skilaboð frá stúlku sem hafði fundið kistilinn „með einkamunum mínum og leyndarmálum í garðinum sínum á víð og dreif. Hún taldi þetta vera þýfi.“
Stúlkan lét lögregluna vita. Vera hrósar lögreglunni fyrir skjót og góð viðbrögð. Vera segir að lokum:
„Hún hafði látið lögguna vita sem bankaði upp hjá mér um miðja nótt til að skila mér kistlinum. Takk lögga!“