Í nýjasta úrskurði mannanafnanefndar hefur millinafninu Dór verið hafnað. Eins og flestir Íslendingar ættu að kannast við, heitir einn ástsælasti söngvari landsins einmitt Friðrik Dór.
Samkvæmt Rúv sem fyrst greindi frá úrskurðinum var kvenmannsnafninu Leah og karlmannsnafninu Hall einnig hafnað. Forsendurnar fyrir því að nafninu Leah var hafnað er sagt vera vegna þess að það brjóti í bág við íslenskt málkerfi þar sem endingin í nafninu eigi sér ekki hliðstæðu við aðrar endingar. Karlmannsnafninu Hall var hins vegar hafnað þar sem nafnið er borið fram eins og þolfallsmynd nafnsins Hallur.
Friðrik Dór hefur þegar fengið upplýsingar um úrskurðinn og á Facebook síðu sinni segist hann ekkert skilja. Væri Friðrik að koma í heiminn núna mætti hann ekki heita Friðrik Dór, en hann mætti hins vegar heita Friðrik Milli, en millinafnið Milli var samþykkt af hinni umdeildu Mannanafnanefnd.
