Margar konur kannast líklega við það að fara inn í verslun, finna sér buxur í sinni stærð, fara inn í mátunarklefa og velta því fyrir sér hvort þær hafi virkilega bætt svona miklu á sig.
Það getur verið alveg óþolandi að geta ekki gengið að því vísu að fatastærðir séu þær sömu á milli merkja, en það er staðreynd sem margar konur kannast við. Þrátt fyrir að flíkur eigi að vera í sömu stærð þá er það því miður þannig að fyrirtæki virðast ekki geta gert þetta rétt. Af hverju er erfitt að skilja, en þetta vandamál getur slegið margar konur út af laginu.
Kona ein sem var orðin þreytt á því að velta því fyrir sér trekk í trekk hvort hún væri búin að bæta á sig eða missa mörg kíló ákvað að taka sig til, taka buxur frá þremur mismunandi fatamerkjum og máta þær. Hún tók mynd af öllum buxunum og setti þær hlið við hlið til þess að sýna hversu mikill munur getur verið á milli númera, þrátt fyrir að allar buxurnar passi eins á hana. Bored Panda greindi frá myndinni og sýnir hún glögglega ástæðu þess að það getur verið vandasamt mál fyrir konur að versla sér föt.