Tara Sverrisdóttir er tuttugu og átta ára gömul og stundar nám við sálfræði. Í kringum árið 2009 byrjaði Tara að teikna myndir og hélt hún myndlistarsýningu á verkum sínum.
Í dag teiknar Tara mikið af skemmtilegum skopmyndum og opnaði hún nýlega síðu á Facebook þar sem hún deilir skondnum en jafnframt alvarlegum aðstæðum.
„Ég er með ansi frjóan haus af allskonar orðaglensi og senum sem ég þarf oft að koma frá mér á blað áður en hausinn fyllist. Innblásturinn hjá mér núna eru meðal annars aðstæður úr geðheilbrigðiskerfinu, en þangað hef ég þurft að sækja mér aðstoð.“
Segir Tara að mikilvægt sé að geta gert grín að öllu.
„Sama hversu hryllilega erfitt það er. Bæði er það heilandi og lætur mann oft sjá hlutina í öðru ljósi.“
Myndir Töru lýsa í senn skoplegum aðstæðum sem fólk með hina ýmsu geðsjúkdóma geta lent í ásamt því að sýna hversu alvarlegt það er að vera með geðsjúkdóm. Einnig sýna þær hvernig fólk sem greint er með einhverskonar geðsjúkdóm er oft ekki tekið alvarlega í samfélaginu.
Hægt er að fylgjast með Töru á Facebook undir nafninu: Tart