Bleikt

8 skotheld stefnumótaráð

Ragnheiður Eiríksdóttir
Laugardaginn 20. október 2018 12:30

Er ástarlífið í lægð? Langar þig í rómantík? Neitar þú að trúa því að stefnumótamenning sé ekki til á Íslandi?

Ef þú ert einn af þeim fjölmörgu sem ofangreint á við (já, við á Bleikt viljum trúa því að deitmenning geti blómstrað á Íslandi), og ert að spá í að kasta þér út í djúpu laugina, er að mörgu að hyggja. Þú hefur kastað út netinu, skráð þig á Tinder, eða álíka og halað inn álitlegan einstakling sem þú getur hugsað þér að kynnast betur í kjötheimum. Hér ber þó að staldra við og huga vel að næstu skrefum. Það er nefnilega ekkert galið að vera aðeins búin/n að undirbúa sig fyrir stefnumót. Hér eru þau atriði sem okkur á Bleikt finnst að þú ættir að hafa í huga:

Tímastjórnun

Íhugaðu vel hversu löngum tíma þú ert tilbúin/n að verja með þessum ókunna aðila. Ef þú ert ekki mjög viss í þinni sök gæti verið öruggast að plana bara kaffibolla – þá er alveg innan velsæmismarka að slíta stefnumótinu eftir hálftíma og þú situr ekki uppi í leiðinlegum félagsskap lengur en sem því nemur. Ef þú ert viss í þinni sök er ekkert að því að plana eitthvað sem tekur mun lengri tíma.

Útlit

Ekki mæta á stefnumót eins og haugur. Farðu í sturtu, klæddu þig í eitthvað sem fer þér vel og vertu búin/n að tannbursta þig á síðasta sólarhringnum. Við erum ekki að mæla með dulargervi, en það felst ákveðin virðing gagnvart mótaðilanum í því að huga að þessu.

Væntingar

Þetta atriði er mikilvægt. Farðu á stefnumót með opinn huga, en gættu þess samt að hafa ekki væntingar um að gneistar fljúgi og að þið endið umsvifalaust uppi í rúmi eða að næsta stefnumót verði á skrifstofu Þjóðskrár til að flytja lögheimilin saman.

Samskipti

Þegðu að minnsta kosti jafn mikið og þú talar. Það er fátt leiðinlegra en að fara á stefnumót með einhverjum sem spyr ekki að neinu og virðist engan áhuga hafa á manni. Hafðu það í huga. Segðu frá þér og svaraðu spurningum en fyrir alla muni reyndu að hafa áhuga á þeim sem situr á móti þér – ef þú hefur það ekki ferðu ekki til helvítis fyrir að þykjast í hálftíma! Mundu líka að hanga ekki í símanum. Ef þú þarft nauðsynlega að instagramma kaffibollann þinn eða átt von á spennandi Nígeríubréfi skaltu reyna að gera það þegar deitið þitt fer á klósettið.

Samræður

Ef þú ert ekki sleip/ur á félagslega svellinu og veist ekki um hvað þú átt að tala undir svona kringumstæðum er enn meiri ástæða til að vera búin/n að undirbúa sig. Oftast hefur eitthvað spjall átt sér stað fyrir stefnumót, og það gæti legið beint við að taka upp þráð þaðan. Flestum finnst gaman að tala um SIG, þannig er yfirleitt snjallt að spyrja að einhverju, sýna áhuga og forvitni. Ef þú lendir í vandræðalegri þögn er hægt að kasta fram skemmtilegri spurningu eins og „hvað dreymdi þig í nótt?“ eða „hefurðu farið í fallhlífastökk“ eða „hvort mundir þú velja að sleppa kossum til æviloka eða að fá bara að hlusta á Justin Bieber til dauðadags?“ eða „hvernig fannst þér skaupið?“.

Sannleikur

Það er best að segja satt. Ekki reyna að vera eitthvað sem þú ert ekki. Ekki ljúga til að reyna að gera þig stærri, breiðari eða skemmtilegri. Ekki segjast hafa drepið hákarl með berum höndum ef þú hefur ekki gert það… og ekki segjast vera einhleyp/ur ef einhver í þínu lífi mundi svara þeirri spurningu öðruvísi. Auðvitað reyna flestir að sýna bestu hliðarnar á stefnumóti – en lygar munu alltaf koma þér í koll.

Eftir stefnumótið

Þegar hér er komið eru bráðnauðsynlegt að hafa tvö lykilatriði í huga: vertu SKÝR og vertu KURTEIS. Hvort sem stefnumótið gerði þig spenntari fyrir frekari kynnum eða ekki er viðeigandi að hafa samband og þakka fyrir sig. Þú getur gert það með facebook skilaboðum, sms-i eða jafnvel símtali. Nú er líka rétti tíminn til að tjá sig um hvort þú værir til í að kynnast viðkomandi betur. Skírleiki getur verið kvalafullur, en hann borgar sig. Ef stefnumótið gerði þig ekki skotnari í viðkomandi er miklu betra að segja það fallega heldur en að hætta að svara og láta ástandið fjara út. Þú gætir sagt eitthvað á þessa leið: „Takk kærlega fyrir stefnumótið. Það var gaman að kynnast þér en ég hef ekki áhuga á nánara sambandi að svo stöddu. Gangi þér vel.“ Eða ef þig langar í frekari kynni: „Takk kærlega fyrir stefnumótið. Mig langar að kynnast þér betur. Ertu til í að hittast aftur?“. Þó að þú sért kurteis og tjáir áhuga á frekari kynnum þýðir það ekki að þú viljir tafarlausa trúlofun.

Ekki óttast höfnun

Ef þú ert spennt/ur fyrir að hitta mótaðilann aftur en hann/hún deilir þeim tilfinningum ekki, hefur það EKKERT með ÞIG að gera. Það hefur hins vegar allt með tilfinningar og smekk mótaðilans að gera. Þú hefur eflaust ákveðinn smekk og mundir hafna mörgum sem eru bæði sætir og skemmtilegir – bara vegna þess að það vantar eitthvað „væb“, einhvern X-faktor, sem er kannski erfitt að festa fingur á. Það kemur kannsi á óvart, en aðrir eru nefnilega líka þannig. Þess vegna er alls ekkert undarlegt að það sé ekki alltaf fullkomið samræmi í vilja og væntingum beggja aðila. Þú ert kannski ananast og þú getur ekki pínt einhvern sem hatar ananas til að borða ananasmáltíð þegar viðkomandi þráir kannski bara gúrkur!

 

Ragnheiður Eiríksdóttir
Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Bleikt
Fyrir 4 dögum

Amanda hræðist framtíðina: „Ég hef áhyggjur – Ég er leið – Ég finn fyrir vanmætti“

Amanda hræðist framtíðina: „Ég hef áhyggjur – Ég er leið – Ég finn fyrir vanmætti“
Bleikt
Fyrir 4 dögum

Ert þú að gifta þig á næsta ári? Brúðarkjólatískan fyrir árið 2019 er komin út

Ert þú að gifta þig á næsta ári? Brúðarkjólatískan fyrir árið 2019 er komin út