Tíu vikna drengur var hætt kominn fyrir skemmstu þegar hár úr móður hans vafðist um fjórar tær á honum. Þetta varð til þess að blóðflæði í tærnar skertist verulega og er nokkuð ljóst að barnið hefði misst tærnar hefði lengri tími liðið.

Alex Upton, 26 ára móðir piltsins, varar foreldra við þessu og hvetur þá til að skoða tær ungra barna sinna reglulega. Hún segir við Mail Online að hún hafi áttað sig á að eitthvað væri að þegar drengurinn vaknaði grátandi og vildi ekki brjóstamjólk.

Alex varð svo litið á tær drengsins og þá sá hún hárið sem hafði vafist um þær. Ein táin var orðin mjög bólgin eins og meðfylgjandi mynd ber með sér.

„Það hafði vafist mjög þétt og það var erfitt að ná því,“ segir hún en það tókst að lokum. Hún fór svo með son sinn til læknis en sem betur fer var skaðinn ekki varanlegur. Deildi hún sögu sinni í þeirri von að vekja aðra foreldra til umhugsunar.