Kæra Ragga
Mundir þú halda að það gæti haft slæm áhrif fyrir par í sambandi að horfa reglulega á klámefni saman. Ég hef rætt þetta við vinkonur og þær eru mjög mótfallnar því og segja að við mundum vilja prófa eitthvað meira í kjölfarið og enda í framhjáhaldi. Eða er svona myndagláp eins og hvert annað hjálpartæki sem kryddar kynlífið? Ég finn að ég örvast alveg jafn mikið og karlinn minn við að horfa, og hef jafnvel smekk fyrir grófara efni en hann – get ég horft á klám og verið femínisti? (vinkonurnar eru ekki á einu máli um það heldur) Hvernig get ég snúið mér í þessu – mér finnst klám æsandi en ég vil ekki leggja sambandið í hættu og ég vil geta kallað mig femínista með góðri samvisku.
Kveðjur og þakkir,
Guðný
Halló Guðný
Mín skoðun er sú að það geti verið skemmtilegt og gott fyrir pör að horfa saman á erótísk myndefni. Smekkurinn er hins vegar mjög einstaklingsbundinn og úrvalið mikið, og því þarf parið að ræða saman um það hvernig myndir það ætlar að horfa á. Hitt er þó löngu sannað að það æsir okkur að horfa á fólk gera dónalega hluti – og gagnkynhneigðar konur eiga meira að segja auðveldara með að æsast en gagnkynhneigðir karlar – þær virðast ekki eins rígbundnar af kynhneigðinni.
Ef þú vilt endilega horfa á mynd með flengingum en karlinn með hópkynlífi þá verðið þið bara að setjast niður og komast að einhverri málamiðlun – svona eins og þegar jólamaturinn er ákveðinn. Svo er líka hægt að velja til skiptis, velja blindandi, kasta teningum eða búa til einhvern skemmtilegan klámleik!
Ég held að það sé mikill misskilningur að klám hvetji til framhjáhalds, heldur frekar að það gefi fólki nýjar og skemmtilegar hugmyndir um það hvernig hægt er að leika sér saman í kynlífinu. Það er æsandi og getur átt sinn þátt í að viðhalda losta og kynferðislegum áhuga milli fólks.
Ég ítreka samt að myndefni af þessu tagi eru mjög mismunandi og því skyldi vanda valið. Fyrir marga er lostaslökkvandi að horfa á myndir þar sem greinilegt er að einhver þátttakandinn er beittur þvingun eða er ekki í hlutverkinu af heilum hug en það má svo sannarlega nota alnetið til að finna myndir sem eru framleiddar á siðferðilega ásættanlegan máta. Ágætt er að hafa í huga að það efni sem flæðir um alnetið og er aðgengilegt ókeypis er mun ólíklegra til að standast þær kröfur. Ef þú borgar fyrir klámið þitt eru meiri líkur á að þeir sem að því stóðu séu að fá laun fyrir vinnuna sína. Klám sem kostar er því betri kostur og klámneytendur ættu heldur að velja það en hitt sem flæðir. Þú getur nefnilega alltaf valið og það á við um klám rétt eins og lífrænt ræktaða grænmetið, snyrtivörur sem eru ekki prófaðar á dýrum, fair trade kaffið og fötin sem ekki eru framleidd af barnaþrælum í Asíu.
Leitarorð eins og feminist porn og ethical porn gætu verið góð byrjun.
Gangi þér vel,
Ragga