Göngugrindur fyrir börn hafa verið notaðar í mörg ár. Tilgangur þeirra er að gefa börnunum tækifæri til þess að komast gangandi á milli staða áður en þau eru búin að læra að ganga sjálf. Nú hefur yfirmaður slysavarna hjá samtökum bandarískra barnalækna varað við notkun göngugrinda.

Segir hann göngugrindur vera „í eðli sínu hættulegir hlutir sem hafa engan ávinning af neinu tagi,“ við NPR og telur hann að þær ættu að vera bannaðar. Dr. Benjamin Hoffmann greinir frá því að nýlega hafi verið sett af stað verkefni í þeim tilgangi að stöðva framleiðslu og sölu á göngugrindum í Bandaríkjunum. Verkefnið er stutt af nýrri rannsókn sem birt var á mánudaginn í tímariti barnalækna. Rannsóknin leiddi í ljós að frá árunum 1990 til 2014 hafi yfir 230.000 börn komið á bráðamóttöku eftir slys sem átti sér stað þegar þau voru í göngugrind. Yfir 90% meiðsla voru á höfði og hálsi barnanna.

Ástæðan fyrir því að göngugrindur eru taldar vera hættulegar fyrir börn er sú að börnin geta farið of hratt þegar þau eru í þeim. Það getur leitt til þess að börnin komi sér í hættulegar aðstæður áður en að fullorðin einstaklingur nái að stöðva þau. Sem dæmi nefna þeir að börn geti fallið niður tröppur, brennt sig illa með því að draga yfir sig potta af eldavél og fleira. Þrátt fyrir að meiðsli barna hafa farið minnkandi undanfarin ár þá eru þúsundir barna sem lenda í slysi vegna göngugrinda á ári hverju. Telja þeir sem framkvæmdu rannsóknina því mikilvægt að stöðva notkun göngugrinda til að koma í veg fyrir frekari áhættu.