Gary Meikle á tuttugu og þriggja ára gamla dóttur sem býr enn heima. Meikle þykir að sjálfsögðu afar vænt um dóttur sína en hann hefur fengið nóg af því að hlusta á endalausar spurningar um hvort augabrúnir hennar séu fallegar eða vel heppnaðar eftir að hún hafi farið til snyrtifræðinga.
Meikle kveðst gera sér grein fyrir að þetta snúist um sjálfstraust dóttur hans og henni líði betur og segist hann bera virðingu fyrir því. En að dóttir hans og aðrar konur séu að velta augabrúnum mikið fyrir sér þykir Gary í meira lagi einkennilegt.
Meikle tók upp myndband þar sem hann veltir því fyrir sér hvenær í ósköpunum augabrúnir urðu að mikilvægasta hluta líkama hverrar konu. Greinir hann frá því að dóttir hans spyrji hann á hverjum einasta degi hvort augabrúnir hennar séu ekki í lagi og er myndskeiðið sem slegið hefur í gegn svar við því.
„Aldrei í sögu mannsins hefur einn maður sagt við annan; Hey gaur, sérðu augabrúnirnar á þessari? Djöfull langar mig í hana […] Okkur er alveg sama um augabrúnirnar ykkar. Þær líta alveg eins út og áður en þú fórst að láta laga þær.“
Myndbandið hefur farið eins og eldur um sinu á samfélagsmiðlum og ekki að ástæðulausu enda er það sprenghlægilegt.