Flestum börnum finnst ótrúlega gaman að fá að leika sér í vatni. Hvort sem það er í baði, sundi eða við læk. Hins vegar leynast miklar hættur fyrir börn nálægt vatni og geta þau drukknað á mjög skömmum tíma í aðeins nokkurra sentimetra háu vatni.

Myndband af tveimur börnum í uppblásinni sundlaug gengur nú eins og eldur um sinu á samfélagsmiðlum en í því má sjá hvernig móðir barnanna stígur til hliðar til þess að sinna síma sínum. Á sömu stundu snýst annað barnið á hvolf í hringkúti sínum og verður algjörlega bjargarlaust undir yfirborði vatnsins.

Katrín Jakobsdóttir, forsætisráðherra Íslands, ræddi um nákvæmlega svona atvik í stefnuræðu sinni á Alþingi í gærkvöldi. Vísaði hún í fréttir frá Þýskalandi þar sem sambærileg atvik hafa komið upp:

„Nýir miðlar eru hluti af stærri mynd samfélagsbreytinga; fjórðu iðnbyltingunni svokölluðu, þar sem miklu máli skiptir að við verðum í fararbroddi. Við vitum að þessi tæknibylting á eftir að breyta atvinnuháttum, vinnumarkaði, menntun og samfélaginu; við vitum líka að hún á eftir að breyta okkur sjálfum og upplifun okkar á veruleikanum. Í þýskum fjölmiðlum voru fréttir af því að óvenju mörg börn hafi drukknað í Þýsklandi í ár vegna þess að foreldrar þeirra voru upptekin í símanum. Við verðum að hafa þor til að horfast í augu við þennan nýja veruleika og samband okkar við tæknina til þess að næstu skref í þróun sambands þessarar tækni og okkar mannanna verði okkur til gæfu,“ sagði Katrín.

Í myndbandinu má þegar systkini barnsins reynir að aðstoða það og ná athygli móður sinnar sem áttar sig engan vegin á stöðunni vegna þess sem hún er að gera í símanum. Sem betur fer tókst að bjarga barninu að lokum.

Myndbandið er óhugnanlegt en mikil forvörn fyrir foreldra: