Tískufyrirtækið Revolve á ekki sjö dagana sæla um þessar mundir eftir að peysur með áletrunum sem sagðar eru gera lítið úr feitu fólki fóru í sölu. Á peysunum, sem kosta hátt í tuttugu þúsund krónur, má finna allskonar áletranir þar sem býsna þung orð falla.
„Það er ekki fallegt að vera feit. Það er afsökun,“ stendur meðal annars á einni peysunni og á öðrum er gert lítið úr femínisma.
Peysurnar hafa vakið talsverða athygli og sitt sýnist hverjum um þær. Fjölmargir hafa þó gagnrýnt Revolve harðlega og hefur fyrirtækið svarað fyrir sig.
Forsvarsmenn Revolve segja að myndir af peysunum hafi farið á netið of snemma. Markmiðið með þeim hafi verið að vekja athygli á svokölluðum nettröllum, sem leika sér að gera lítið úr fólki á netinu í skjóli nafnleyndar. Það að myndirnar hafi farið á netið svo snemma hafi gert það að verkum að allt hafi verið slitið úr samhengi.
Ef vel er að gáð sést að smáletraður texti er undir áletrunum þó hann sjáist ekki á meðfylgjandi myndum eða þeim sem hafa verið birtar á netinu. Staðreyndin er sú að þetta eru orð sem látin hafa verið falla við myndir af þekktum einstaklingum; Emily Ratajkowski, Cara Delevingne, Suki Waterhouse og Paloma Elsesser svo dæmi séu tekin.
Þrátt fyrir þetta hafa fjölmargir látið Revolve heyra það á Twitter. „Þetta er ógeðslegt. Hverjum datt í hug að þetta væri góð hugmynd?“ sagði til að mynda einn notanda á meðan annar bætti við: „Ég móðgast ekki auðveldlega en þessi peysa sendir kolröng skilaboð til þeirra sem eru að glíma við ofþyngd eða offitu.