Mæðurnar Hildigunnur Borga Gunnarsdóttir og Sandra Gunnarsdóttir opnuðu nýverið verslunina Regnbogann á Facebook og Instagram. Hildigunnur og Sandra eru báðar nýbúnar að eignast litla stráka og eiga þær það sameiginlegt að vilja klæða þá í alla liti regnbogans og kviknaði hugmyndin að versluninni út frá því.
„Við viljum að börnin okkar geti skartað hvaða lit sem er og þau trúi því seinna meir að þau geti valið sér það sem þeim finnst flottast. Við leyfum þeim að alast upp í umhverfi þar sem allir möguleikar eru opnir og við setjum þau ekki í neitt box,“ segja þær í viðtali við Bleikt.
„Strákarnir okkar eru því oft í bleikum og fjólubláum fötum og í fötum með blómum og glimmeri sem í okkar samfélagi telst bara vera fyrir stelpur. Við tókum eftir því í verslunum hérlendis að þær eru lang flestar kynjaskiptar og stelpudeildirnar eru oft mjög litríkar með pallíettum, glimmeri og fleiru skemmtilegu á meðan strákadeildirnar eru oft mjög daufar í litum, mikið grátt, blátt og brúnt.“
Einnig finnst þeim vöntun á kjólum með til dæmis bílamunstri, risaeðlumunstri og fleiru sem telst vera fyrir stráka.
„Við vildum því opna Regnbogann og bjóða upp á litrík unisex föt og féllum við fyrir nokkrum sænskum fatamerkjum sem eiga dásamlega vel við okkar hugsjón. Við kyngerum ekki fatnaðinn okkar og við hverjum auðvitað fólk til þess að ögra þessum staðalímyndum kynjanna.“