Margrét Friðriksdóttir, stjórnandi Stjórnmálaspjallsins á Facebook, hefur staðið í ströngu síðustu daga. Í síðustu viku greindi DV frá því að Margrét hefði í ölæði ráðist að Semu Erlu Serdar fyrir utan veitingastað við Grensásveg. Kvaðst Margrét ætla að hætta áfengisneyslu eftir uppákomuna. Upplifun Margrétar og Semu Erlu er með gjörólíkum hætti en Margrét sagði að henni hefði verið gert að yfirgefa veitingastaðinn þar sem Sema Erla væri á leið þangað með vinum sínum en staðurinn er í eigu föður Semu Erlu.
Sagði Margrét að hún hefði stjakað við Semu. Einn heimildarmanna DV hafði aðra sögu að segja og sagði að Margrét hefði blótað Semu í sand og ösku og sagt að erlendur kærasti sinn myndi lúskra á þeim öllum og væri með svarta beltið í karate. Sjálf sagði Sema að Margrét hefði hótað að drepa hana og kýlt hana í öxlina. Sema gerði sér síðan ferð nokkrum dögum síðar niður á lögreglustöð og kærði Margréti sem ætlaði að kæra Semu til baka og vildi meina að hún hefði lúskrað á henni.
Margrét fór svo í kærkomið frí erlendis í vikunni til að hlaða batteríin. Þann sama dag greindi hún frá því að hún væri byrjuð með kærasta sínum, hinum franska Vincent Ravaceh, þeim hinum sama sem kann eitt og annað fyrir sér í karate og dró Margréti í burtu kvöldið örlagaríka á Grensásvegi.
