Erna Kristín Stefánsdóttir, hönnuður, snappari og guðfræðingur og Bassi Ólafsson tónlistarmaður og trommuleikari í Kiriyama Family gengu að eiga hvort annað í drauma brúðkaupi á Ítalíu þann 18. júlí síðastliðinn.
„Í fyrstu var þetta fjarlægur draumur sem síðan skyndilega varð gerlegri þegar við fylgdumst með vinafólki okkar gifta sig í þvílíkri paradís á Ítalíu. Við ákváðum þá að stökkva til og sjáum svo sannarlega ekki eftir því. Við svífum enn á bleiku skýji,“ segir Erna sem er nýkomin aftur heim til Íslands.
„Brúðkaupið var haldið rétt við bæinn San Severino Marche í undurfallegri Villu sem við leigðum með fjölskyldu og vinum í viku.“
Erna lýsir brúðkaupsathöfninni sjálfri sem draumkenndri en dóttir þeirra hjóna ásamt tveimur dætrum systkina hennar gengu á undan Ernu inn sem blómastelpur við undirspil lagsins „Somewhere over the rainbow“ sem dóttir þeirra söng.
„Ég kom síðan á eftir í fylgd föður míns og tók mamma mín svo við í miðju og leiddi mig restina til Bassa.“
Ein elsta og besta vinkona Ernu gaf þau svo saman við fallega athöfn.
„Við verðum svo gefin saman af presti hérna heima á Íslandi þar sem pappírsvinnan á Ítalíu er svo rosalega flókin. Planið var að vera búin að gera þetta löglega hjá presti hérna heima áður en við færum út en vegna tímaleysis þá varð það að bíða. Við erum samt agalega spennt fyrir því þar sem nokkrir nánir og mikilvægir aðilar komust ekki til Ítalíu og munu þeir því eiga þá stund með okkur í einni af fallegustu kirkjum Íslands.“
Hægt er að fylgjast með Ernu á Instagram undir notandanafninu: Ernuland
