Prins Louis, sem er orðinn 11 vikna gamall, verður skírður í dag af erkibiskupnum af Canterbury í fámennri fjölskylduathöfn í St. James´s höll. Louis er fimmti í röðinni sem erfingi bresku krúnunnar.
Verður þetta í fyrsta sinn sem fimm manna fjölskylda hans og foreldra hans, hertogans og hertogaynjunnar af Kent, mun sjást opinberlega.
Athöfnin sem mun taka fjörutíu mínútur mun fara fram kl. 16 í dag að staðartíma og það er erkibiskupinn af Canterbury, Justin Welby, sem mun stjórna henni í konunglegu kapellunni í St. James höllinni.
Louis verður klæddur í sama skírnarkjól og eldri systkini hans, George og Charlotte, klæddust. Hann er eftirlíking af skírnarkjól, sem gerður var fyrir Victoriu, elstu dóttur Victoriu drottningar, árið 1841.
Gestalistinn er ekki opinber ennþá, en konunglegar skírnarathafnir eru vanalega fámennar fjölskylduathafnir. Líklegt er að prins Harry og Meghan Markle, hertoginn og hertogaynjan af Sussex, verði við athöfnina, en Meghan var skírð og fermd af erkibiskupnum í sömu kapellu í mars síðastliðnum. Einnig er talið að systir Kate, Pippa Matthews, verði viðstödd, en hún er barnshafandi.
Einnig er eftir að tilkynna hverjir verða guðforeldrar Louis, en ef marka má skírn systkina hans, þá verða þeir nánir vinir prins William og Kate.
