Það er aldrei of oft bent á þær hættur sem börn geta lent í á heimilinu. Oft er um að ræða hluti sem foreldrar gera sér ekki grein fyrir að geta á ögurstundu reynst lífshættulegir fyrir litlu krílin okkar. Foreldri þarf ekki nema að líta undan í eitt augnablik og þá getur barnið verið búið að koma sér í lífshættulegar aðstæður.
Kommóður og stórir skápar hafa verið mikið í umræðunni undanfarið. Börn eiga það til að klifra upp í kommóður sem ekki eru veggfastar og skapast þá mikil hætta þar sem kommóðan getur auðveldlega dottið yfir barnið.
Hér fyrir neðan má sjá lista af venjulegum hlutum sem eru nánast inni á hverju heimili en geta auðveldlega verið hættulegir fyrir börn:
Hlutir sem geta innihaldið mikið magn af vatni geta verið hættuleg fyrir börn. Börn elska að leika sér með vatn og ef þau eru skilin eftir ein nálægt baðkari eða fiskabúri geta þau auðveldlera dottið ofan í. Jafnvel þótt vatnsyfirborðið sé ekki hátt þá eru aðstæðurnar hættulegar fyrir börnin.
Mikilvægt er að hafa rafmagnstæki þar sem börn ná ekki til þeirra. Innstungum þarf að loka ef þær eru í þeirri hæð að börn ná til þeirra.
Börn elska að klifra. Skápar, hillur, kommóður og öll þau stóru húsgögn sem börn geta klifrað í, þarf að festa við veggi.
Snúran sem hangir niður úr gluggatjöldunum okkar er stórhættuleg fyrir börnin okkar. Um 17 þúsund börn hafa slasað sig á gluggatjaldasnúrum á milli áranna 1990 og 2015. Af þeim voru 300 börn sem létu nánast lífið vegna atviksins. Nokkur börn hafa dáið eftir að hafa vafið snúrunni um hálsinn á sér.
Flest heimili hafa ketil. Ef ekki er farið varlega og passað að hafa hann staðsettan þar sem börn ná ekki til, geta börnin auðveldlega brennt sig alvarlega.
Öll börn munu koma til með að detta. Bæði þegar þau eru að læra að ganga og svo þegar þau eru orðin eldri og farin að hlaupa um allt hús. Skarpar brúnir á húsgögnum geta verið virkilega hættulegar fyrir börn ef þau detta á þær. Það er því mikilvægt, sérstaklega þegar börnin eru ung og að læra að ganga að setja einhverskonar vörn á skörpustu brúnirnar.
Í augum barnanna eru lyf eins og sælgæti. Þau gera ekki greinarmun og átta sig ekki á hættunni við það að smakka. Lyf eiga því alltaf að vera geymd í lokuðum skáp þar sem börn ná ekki til.
Ef börn fá heita drykki í glerglasi geta þau auðveldlega brennt sig. Einnig geta þau skorið sig ef glasið brotnar. Því er mikið hentugra að gefa þeim plastglös.
Litlir hlutir eins og tölur og perlur geta verið mjög hættuleg fyrir ung börn. Þau eiga það til að stinga hverju sem þau finna upp í sig og geta því kafnað á því. Bláber, vínber, hnetur og þess háttar lítill matur getur líka verið virkilega hættulegur fyrir börn. Það er alltaf mælt með því að skera ber í minni bita og fylgjast vel með þegar börn borða þau.
