Niðurstöður bandarískrar rannsóknar sýna að kynlíf að kvöldi til eykur starfsgleði fólks um allt að fimm prósent næsta dag. Kynlíf gerir fólk glaðara og áhrifin af kynlífsiðkuninni vara frá morgni til kvölds næsta dag. Áhrifanna gætir ekki síst í vinnunni, það eykur mótstöðuna gegn stressi og neikvæðum upplifunum og veitir fólki hvatningu til að gera betur í vinnunni.
Þetta kom fram í umfjöllun Danska ríkisútvarpsins (DR) um málið. Þar segir að vísindamenn við háskóla í Washington og Oregon hafi rannsakað þetta. Niðurstaða þeirra er að kynlíf að kvöldi til er gott fyrir vinnuumhverfið og eykur starfsgleði fólks um allt að fimm prósent.
DR hefur eftir Jesper Bay-Hansen, kynlífsfræðingi, að þessar niðurstöður komi honum ekki á óvart. Hann segir að ánægjulegt kynferðislegt samneyti hafi mörg jákvæð áhrif á fólk, hversu opið það er, hversu viljugt það sé til að sinna verkefnum, hversu auðvelt það eigi með að sjá ný tækifæri, hugsa hlutina upp á nýtt, hugsa skapandi og fleira.
Hann segir að lykilatriðið í þessu sé þó að nautn tengist kynlífinu. Kynlíf sem tengist leiða og skorti á löngun geti haft neikvæð áhrif á fólk. Það sé því rétt að segja að nautnafullt kynlíf sé gott fyrir líðan fólks, bæði í sambandinu og utan þess, og að það geti haft jákvæð áhrif á vinnuumhverfið.