Ragna Sif Pétursdóttir tekur undir kjarabaráttu ljósmæðra með því að skrifa einlægt og harðort bréf um fæðingu fjórða barns hennar.

Eftir fjórðu fæðingu Rögnu missti hún mikið blóð, var mjög veikburða og gat hún ekki gengið í tvo daga.

„Ég fékk aðstoð hjá ljósmóður við að labba, skipta á barninu og mér! Einmitt!“ Segir Ragna sem segist í samtali við blaðamann hafa skrifað færsluna beint frá hjartanu.

„Svo var það hún María sem er á þessari mynd sem tók drenginn minn í tvær nætur svo ég fengi að sofa! Óumbeðin takk. Þau voru að kúra og spjalla á meðan ég svaf. Kom og lagði hann á brjóst og tók hann svo aftur. Þær eru nefnilega að vinna á nóttinni líka sko! Gerir ráðherra sér grein fyrir því?“

Ragna segir aðstoð Maríu hafa bjargað lífi hennar og þakkar hún henni fyrir allt.

„Í þessari stöðu var þetta það BESTA sem gat komið fyrir mig. Ég grét af glaði þegar enginn sá. Þær eru frá sinni eigin fjölskyldu til þess að hugsa um og bjarga öðrum. Á launum eins og þær væru að vinna 9-14. Það að þessar konur séu ekki metnar af verðleikum er mér FULLKOMLEGA óskiljanlegt. Ég ætla ekki að nefna hér ALLA fyrirmenn þessarar elítu sem þrífst hér á landi í skjóli vina, fjölskyldutengsla og forstjóra sem fá spikfeitar launahækkanir trekk í trekk að því er virðist.“

Ragna segist vera virkilega reið yfir ástandinu og lýsir yfir fullum stuðningi sínum við ljósmæður í þeirra kjarabaráttu.