„Elsku engillinn minn, lífið verður ekki eins án þín. Þessa litlu stund sem við áttum saman verður mér minning sem aldrei mun fara. Þú áttir hjartað mitt og því mun ég aldrei gleyma.“
Á þessum orðum hefst hjartnæm færsla Ernu Christiansen sem missti í dag rúmlega þriggja ára gamla tík sína, Visku, sem varð fyrir bíl.
Á sunnudagskvöldið var Viska úti í garði eins og svo oft áður, þegar henni tókst að smeygja sér í gegnum litla rifu á girðingu sem Erna vissi ekki af. Erna hafði farið inn til þess að sækja nammi fyrir Visku og þegar hún kom til baka var hún horfin.
Erna setti stöðuuppfærslu á samfélagsmiðla þar sem hún bað fólk um að hafa auga með Visku sem var af tegundinni Russian Toy sem er lítil tegund. Fjöldi fólks hjálpaði Ernu við leitina af Visku en því miður fannst hún illa farin eftir að bíll hafði keyrt á hana og ekki stöðva bifreið sína til þess að gá að henni.
„Þegar amma þín kom grátandi niður til mín eftir erfitt símtal við konu sem varð vitni af því þegar fávitinn keyrði á þig og gat ekki stoppað til þess að tékka á þér. Hjartað þitt sló síðustu slættina í höndunum á ókunnugri konu sem veitti þér hjálparhönd.“
Erna keyrði með brotið hjarta og uppgefin til þess að sækja Visku eftir að hafa fengið fréttirnar.
„Ég vildi ekki trúa því að þú værir farin svona snemma. Þú sem varst aldrei vön að fara eitthvert og varst minn tryggi félagi. Þú verður ávallt hjá mér í hjarta. Hvíldu í friði elsku prakkarinn minn, lífið verður sko ekki eins án þín.“
Erna, sem er ræktandi tegundarinnar Russian Toy á Íslandi er miður sín vegna atburðarins. Vill hún vekja athygli fólks á því að stöðva bifreið sína ef svo illa vill til að það keyri óvart á dýr. Þó ekki sé nema bara til þess að tilkynna eiganda um slysið.
„Það er mikilvægt að hjálpa dýrinu eins og þú mögulega getur, bíða eftir eigandanum og fara með dýrið upp á dýraspítala ef þess þarf. Hugsaðu þig líka tvisvar sinnum um áður en þú keyrir í burtu. Þetta er dýr sem einhver elskar. Þetta er fjölskyldumeðlimur.“
