Hin 29 ára Kelly Marie Tran var óþekkt leikkona áður en hún fékk stóra tækifærið með Star Wars-myndinni The Last Jedi, sem frumsýnd var í kringum jólin 2017, og varð á augabragði heimsfræg.
En ekki er alltaf stöðugur glans í glamúrnum því Tran hefur verið ítrekað undir árásum hrotta á samfélagsmiðlum og víða.
Persóna Tran, Rose Tico, birtist fyrst í The Last Jedi og hefur frá útgáfu myndarinnar þótt afar umdeild á meðal Star Wars aðdáenda. Hafa hinir reiðustu beint sínum spjótum að leikkonunni.
Algengustu ummælin hafa snúist um hversu „tilgangslaus persóna“ Rose er í heimi þessara mynda – eða hversu vond sumum þykir myndin, en einnig var margoft skotið á kynþátt hennar.
Tran eyddi út öllum færslum sínum af Instagram fyrir skömmu eftir að mælirinn fylltist.
En reiðina var ekki bara að finna á Instagram.
Á vefnum WookiePedia, upplýsingasíðu Star Wars heimsins, ákváðu einhverjir að uppfæra persónuprófíl Rose þar sem hún var kölluð „heimsk, einhverf og þroskaheft.“ Nafni persónunnar var að auki breytt í Ching Chong Wing Tong áður en það var leiðrétt.