Núna um daginn gerði ég þessa köku fyrir 7 ára afmæli, þemað var Super Mario Bros og varð ég að sjálfsögðu að þeirri ósk.
Afmælisbarnið vildi súkkulaðiköku með súkkulaði kremi og uppskriftin sem ég notaði er gömul skúffuköku uppskrift frá mömmu með smá twist! Kakan var samsett úr fjórum 26cm botnum og súkkulaði smjörkrem á milli.
Þegar ég var svo búin að slétta eins vel og ég gat úr blessuðu smjörkreminu þá fór kakan í frysti og við tók að vigta og hnoða lit í sykurmassann og fletja hann út. Ég get með sanni sagt að þetta gekk EKKI eins og í sögu heldur þurfti ég að fletja massann út ekki einu sinni heldur tvisvar því hann festist alltaf við borðið! Ég viðurkenni að mig langaði til að garga þar sem ég hafði lítinn tíma til að græja þetta allt EN þetta hófst á endanum.
Hér er ég að byrja að fletja massann, ég notaði karteflumjöl undir því það þurrkar ekki upp sykurmassann eins og flórsykurinn gerir.
Hér er svo massinn kominn á og bara eftir að slétta aðeins úr honum og skreyta!
Loka útkoman var svo svona en ég gerði Mario sjálfan úr Gumpaste, og hinar fígúrurnar líka, stjörnurnar, skýin og rest var svo úr sykurmassa sem ég litaði eftir þörfum og það sem bjargaði geðheilsunni var að ég gerði allar skreytingar daginn áður og geymdi í loftþéttu boxi.
Ég var ekkert lítið sátt með loka útkomuna enda er þetta fyrsta sykurmassa kakan sem ég geri ein og óstudd! Afmælisbarnið var mjög ánægt og það er ALLT sem skiptir máli.
Færslan birtist upphaflega á Öskubuska.is
