Í gær vakti greinarmoli í Fréttablaðinu, sem bar heitið „Flott í bikiní“, gríðarlega athygli og gagnrýni á samfélagsmiðlum. Fjöldi kvenna dreifði myndum af greininni og ljóst var að þær voru óánægðar með þá óvirðingu gagnvart kvenlíkamanum sem greinarmolinn fól í sér. Hafdís Magnúsdóttir var ein þeirra sem deildi mynd af greininni með eftirfarandi orðum:
„Bara svo starfsmenn Fréttablaðsins vita, þá er árið 2018 og við þurfum ekki ráð við því hvernig við förum í bikíni og hvernig við undirbúum fyrir bikiní. Það er alveg nóg að eiga bikiní og klæða sig í það og njóta og þá er markmiðinu náð.
Ég veit af alltof mörgum konum á öllum aldri sem neita sér það að fara í sund eða á ströndina því það veldur kvíða og óöryggi með líkama þeirra. Takk eða þannig því þessi grein hjálpar ENGUM!!!!
Kveðja frá þessari sem ætlar EKKI að grafa sig ofan í sandinn í sumar, né krossleggja fætur og teygja úr sér svo fitukeppirnir sjást ekki né ætla ég að borða bara hnefafylli af mat í hvert sinn eða forðast salt, brokkolí (ok jú forðast brokkolí því það er ógeð) og önnur matvæli þremur dögum áður en ég fer í bikiní.“
Hafdís deildi einnig tveimur myndum af sér í bikiní og alveg greinilegt að hún er fullfær um að klæðast því hvenær og hvar sem hún velur sjálf.
Okkur á Bleikt finnst allar konur vera fallegar, og við hvetjum konur til að taka þátt og deila myndum af sér undir þessa grein og/eða á samfélagsmiðla með myllumerkinu #bikinilikami.
Verum heilbrigðar fyrirmyndir fyrir okkur og aðra, sátt í sál og skinni.
